जनकपुरधाम :  धनुषा जिल्लाको लक्ष्मिनीया गाउँपालिकास्थित लक्ष्मिनिया बजारमा रहेका त्रिदेव अंग्रेजी आवासीय माध्यमिक विद्यालयले आफ्नो २५ औं स्थापना दिवस रजत जयन्तीको रुपमा मनाएको छ ।

जिल्लाको ग्रामीण क्षेत्रमा विगत २५ वर्षदेखि अंग्रेजीसहितको गुणस्तरीय शिक्षाको उज्यालो फैलाउँदै आएका सो विद्यालयले सामाजिक उत्तरदायित्व पनि उत्तिकै प्रभावकारी रूपमा वहन गर्दै आएको भनी कार्यक्रममा उपस्थित वक्ताहरूले बताएका छन् ।

समारोहका प्रमुख अतिथि पूर्वराजदूत प्रा.डा. रामस्वार्थ रायले अंग्रेजी माध्यमको शिक्षा आजको आवश्यकता हो । विगत २५ वर्षदेखि ग्रामीण भेगमा त्रिदेव विद्यालयले अंग्रेजी माध्यमको शिक्षाबाट पुरयाउंदै आएको सेवा निकै सराहनीय रहेको भनी प्रशंसा व्यक्त गरे ।

उनले अंग्रेजीसहित विज्ञान, प्रविधि र नैतिकताको समिश्रणमा आधारित शिक्षासंगै संस्कार आजको आवश्यकता रहेको भन्दै यस्ता शिक्षामार्फत सामाजिक रूपान्तरण सम्भव हुने धारणा राखे ।

कार्यक्रमका विशिष्ट अतिथि तथा मधेश प्रदेश सभा सदस्य रामअशिष यादवले यस त्रिदेव विद्यालयले गुणस्तरीय शिक्षासँगै संस्कार, संस्कृति र सामाजिक भावनाको संरक्षणमा पनि योगदान पु¥याएको भनी प्रशंसा गरे । उनले भने ‘आजका विद्यार्थी भोलिका नेता, वैज्ञानिक र समाजसेवी हुन् । त्यसकारण विद्यालयको दायित्व अझ ठूलो रहेकोमा त्रिदेवले सो भूमिका निर्वाह गर्न सफल रहेको छ ।’

लक्ष्मिनीया गाउँपालिकाका अध्यक्ष भोगेन्द्र झाले विद्यालयले गाउँपालिकाको शैक्षिक विकासमा खेलेको भूमिकाको प्रशंसा गर्दै भविष्यमा पालिकाले विद्यालयसँग सहकार्य गर्ने प्रतिबद्धता व्यक्त गरे । कार्यक्रममा प्याब्सनका केन्द्रीय तथा जिल्ला पदाधिकारीहरूले समेत आ आफ्ना धारणा राखेका थिए ।

कार्यक्रममा कबिर बाल आश्रमका सञ्चालक सन्त आलोकलाई विद्यालय परिवारद्वारा सम्मान गरिएको थियो । साथै, बाल आश्रमका बालबालिकालाई खाद्यान्न तथा शैक्षिक सामग्री (कापी–कलम) प्रदान गर्ने घोषणा गरिएको छ । सो सामाग्री शुक्रवार आश्रममै प्रदान गरिने जनाइएको छ ।

विद्यालयका संस्थापक अध्यक्ष ब्रम्हदेव यादवको अध्यक्षतामा सम्पन्न समारोहमा प्रिन्सिपल एवं संचालक नवल यादवले सबै अतिथि, अभिभावक र शिक्षकहरूलाई स्वागत गर्दै विद्यालयलाई अझ प्रगतिशील बनाउने प्रतिबद्धता जनाएका छन् ।